يوسيف و ائسفير
بني-ايسرايل يوسيفله آروادي ائسفير گؤزل، صفالي دوزنليکله ساکيت-ساکيت آخان، سويو گون ايشيغيندا آلماز کيمي پارلايان بير چايين ساحيلينده بالاجا، سليقه لي ائولرينده ياشاييرديلار. اونلارين حياتي دا همين او چاي کيمي ساکيتجه آخيب گئديردي.
قيرخ ايل ايدي کي، يوسيف آللاها عيبادت ائديردي. داشا گيرن کاهين ايبراهيم دئميشدي کي، کيم قيرخ ايل هر گون، هر گئجه آللاها عيبادت ائلسه، آللاه اونون اوچ خواهيشيني يئرينه يئتيرر. يوسيف بير گون ده عيبادتي نين واختيني کئچيرميردي. خوش قيليق، هوسلي بير قادين اولان ائسفير حَيَطلرينده تويوق-جوجه، قاز ساخلايير، بوتون گونو هوسله ائو-ائشيکله مشغول اولور، يوسيفين چايدان توتدوغو باليقلاردان لذتلي خؤرکلر بيشيريردي و سوتونلارينا سارماشيقلار سارماشميش ائيواندا اَيلشيب راحاتجا ناهار ائله ييرديلر. سونرا يوسيف عيبادته باشلايير، ائسفير ايسه آخشام چايدا چيممه يه گلن گنجلره تاماشا ائتمه يه گئديردي.
جاوان قيزلارين، اوغلانلارين شن گولوشلرله چايين آلماس کيمي پارلايان سويوندا بير-بيريلري ايله ظارافاتلاشمالاري، اوغلانلارين گؤزل قيزلاري سودا قوووب، توتوب اؤپمه لري، سونرا ساحيلده ايستي قومون اوستونده اوتوروب، قديم بني-ايسرايل ماهنيلاري اوخومالاري ائسفيره حسرتلي بير ذؤوق وئريردي. حسرت اونون حياتي نين کئچميشي ايله باغلي ايدي. اونون گنجليگي بو گنجلرين حياتي کيمي بئله شن، قايغيسيز کئچمه ميشدي. يئددي اوشاغي اولان کاسيب آتا-آناسي اونو ميشووول پيشيگي کيمي قيزيل اوسته ياتان سلمچي سالومونا قوللوقچو وئرميشدي. سالومونون آروادي راخيل ده ظاليم قادين ايدي. ائسفيرله شيرين ديلله مئهريبان رفتار ائدير، آما او شيرين ديلله ده هئي ايشله دير، بير دقيقه ده نفسيني درمه يه ايمکان وئرميردي.
يوسيف سالومونون گؤزل باغيندا باغبان ايشله ييردي. اؤزو ده بير کؤنولدن مين کؤنوله ائسفيره عاشيق ايدي. نئچه دفعه گيروه يه ساليب، اورگيني قيزا آچميشديسا دا، ائسفير آه چکيب باشيني بولاميشدي. ائسفير يوسيفين ياخشي اوغلان اولدوغونا، اونو دا صميمي قلبدن ايسته ديگينه اينانيردي. آنجاق بو ياخشي اوغلانين خاريجي گؤرونوشو، درينليکده ايشيلدايان بالاجا، ياشيل گؤزلري، لاپ اوجوندا زيگيل اولان ايري بورنو سانکي هر دفعه يوسيفله قارشيلاشاندا قيزي گئري ايتله ييردي. آما نئيله يه سن کي، ديگر اوغلانلار دا گؤزل قدد-قامتي، جاذيبه دار گؤز-قاشي اولان، گونده اون آدامين ايشيني گؤرن ائسفيري سانکي گؤرموردولر.
بير دفعه ائسفير ائوين توزونو آلديغي زامان سالومونون قيزي سارانين شيت، دلدوز بير اوغلان اولان نيشانليسي اونون بيلگيندن توتوب دئميشدي:
- منيمله دوست اول، هر آي سنه بوردا آلديغيندان اون قات آرتيق وئريم.
ائسفير ده اونون بورنونون اوستونه ائله بير يومروق وورموشدو کي، اوزون مودت قاني کسيلمه ميشدي.
اينسان درديني ياخين بير آدامينا دئمه ينده راحات اولا بيلمير. ائسفيرين ده يوسيفدن باشقا ياخين آدامي کيم ايدي کي؟.. قيز باغا قاچيب، يانا-يانا آغلاياراق، بو احوالاتي يوسيفه دانيشدي. آغير بير سوکوتدان سونرا يوسيف دئدي:
- آخي سن نه واختا قدر آرابا آتي کيمي اجلافلارا ايشليه جکسن؟ اونلاردان بوندان آرتيق نه گؤزله ييرسن؟ نييه منيم آرواديم اولماق ايستميرسن؟ آخي بيليرسن کي، سني نه قدر ايسته ييرم. نئچه واختدير من ده ايشله ييرم، آزدان-چوخدان گئرييه قويموشام. قانونلا ائولنريک، يئر آليب بالاجا بير ائو تيکريک، باغ سالاريق. بوتون آغاجلارين ديليني بيليرم. گؤزل اوشاقلاريميز اولار.
يوسيف بئله دئينده، ائسفير آه چکيب يوسيفين زيگيل اولان بورنونا باخدي... و نه اوچونسه آغلادي.
و او گئجه اوزون زامان ياتا بيلمه دي... فيکيرلشدي کي، ايللر کئچيب گئدير... اون دوققوز ياشين ايچينديم. من آرزو ائله ديگيم اوغلانلارين هئچ بيري منيمله ماراقلانمادي. ماراقلانان دا آنجاق مووققتي اَيلنجه اوچون... يوسيفه گئتسم، هئچ اولماسا، اؤز ائو-ائشيگيم اولار. بلکه آللاه گؤزل بير اؤولاد دا وئردي...
ائسفير آه چکيب، يوخويا گئتدي.
...و اوچ گوندن سونرا يوسيف مجليس پالتاريني گئييب، سالومونون حوضورونا گئده رک، ادب-ارکانلا اونا بيلديردي کي، ائسفيرله ائولنمک ايسته يير.
حدديندن آرتيق کؤک، خوش صيفت بير کيشي اولان سالومون آروادي کيمي رحمسيز دئييلدي. اينسانلارا ياخشيليق ائتمکدن لذت آليردي. يوسيفله ائسفيرين ائولنمک احوالاتيني خوشحالليقلا قارشيلادي، حتّی هر بيرينه اوچ آيليق آلاجاقلاري قدر ده آيين-اويون باغيشلادي.
يوسيفله ائسفير ائولنندن سونرا ايندي ايچينده ياشاديقلاري کورسولو، سليقه لي ائوي تيکديلر. ار-آرواد گئجه-گوندوز ايشليه رک، گؤزل باغ دوزلتديلر. سونرا اؤولاد گؤزله مه يه باشلاديلار. لاکين ايللر کئچير، بؤيوک اينتيظارلا گؤزله ديکلري اوغلان، يا قيز گليب چيخميردي کي، چيخميردي...
گؤزله ديکلري اؤولادين طالعيي حاقيندا هر کسين اؤز آرزوسو وار ايدي. يوسيف ايسته ييردي کي، اوغلو اولسون، اوخوسون، سالومون کيمي تاجير اولسون.
ائسفير ايسته ييردي کي، گؤزل بير قيزي گلسين دونيايا، اونا گؤزل رقصلر اؤيرتسين و حضرت يوسيف کيمي (اتاسي يوسيف کيمي يوخ!) گؤزل بير اوغلانا اره گئتسين.
لاکين ايللر کئچيردي... نه اوغلان گليردي، نه قيز...
او زامان يوسيف، داشا گيرن کاهين ايبراهيمين يانينا گئديب، احوالاتي اونا دانيشدي. کاهين ايبراهيم دئدي:
- کيم قيرخ ايل، هر گون، هر گئجه آللاها عيبادت ائلسه، آللاه اونون اوچ آرزوسونو يئرينه يئتيرر...
...و او گوندن يوسيف باشلادي گئجه-گوندوز آللاها عيبادت ائتمه يه. ائسفير چايدا چيميب-شنلنن گنجلره تاماشا ائله ييب، ائوه گلنده، گوزگوده اؤزونه باخاندا، اونا چوخدان ويداع ائتميش او گؤزلليگي حاقيندا دوشونه رک آه چکيردي.
...بودور قيرخ ايل ده کئچدي. يوسيف بيرينجي آرزونو ديله ييب، آللاهدان اؤولاد ايستمه يه حاضيرلاشيردي و گؤزله نيلمه دن ائسفير اونا يالواردي کي، يوسيف آللاهدان اونا، يعني آروادي ائسفيره بير گؤزلليک ايسته سين!..
ائسفيرين قفيل بيان ائتديگي بو آرزو يوسيفين بوتون فيکيرلريني آلت-اوست ائتدي. اونو او قدر هيجانلانديردي کي، آرتيق هئچ نه حاقيندا ساکيت دوشونه بيلمه دي. مساله اوندا ايدي کي، يوسيف ائسفيرين کئچميش گؤزلليگي نين حسرتيني چوخ چکيردي... بير ده ائله جانلا گؤروشمک، او ذؤوق-صفاني حيسس ائتمک اونا هاردان نصيب اولا بيلردي؟ ائسفير کيمي گؤزل، طالعيين اونا قيسمت ائتديگي يئگانه بخشيش ايدي. ايندي اگر آللاه-تعالي ائسفيرين کئچميش گؤزلليگيني، گنجليگيني اؤزونه قايتارسا، دئمک، حيات اونون دا، يوسيفين ده اوزونه تزه دن گوله جک و يوسيف سونرا آللاهدان ديليه جک کي، بو گنج، گؤزل آرواديندان اونا بير اؤولاد وئرسين...
...و يوسيف اوچ ديلکدن بيرينجيسيني بيان ائديب، آللاهدان ائسفيرين اون سککيز ياشينداکي گؤزلليگيني اؤزونه قايتارماسيني ريجا ائتدي.
و آللاه ائسفيرين اون سککيز ياشينداکي گؤزلليگيني اونا قايتاردي.
ائسفير گوزگونون قاباغيندا دوروب، اؤزونه تاماشا ائديردي. يوسيف حئيران-حئيران اونا باخاراق بيلگيندن توتدو. آنجاق ائسفير بيلگيني جلد اونون اليندن قوپاراراق، يوسيفي بيرينجي دفعه گؤرورموش کيمي، سرت نظرله بورنونا باخدي و دئدي:
- نئيله ييرسن، اوتانميرسان، قوجا کيشيسن!..
يوسيف ائله بيلدي کي، ائسفير ظارافات ائله يير، شاد-خوررم گولوب دئدي:
- گرک سنه ايندي بدنينه گؤره پالتار تيکديرک. ياشلي واختيندا کؤکلديگين اوچون، پالتارلار چوخ گئن اولور.
ائسفير چوخ جيدي ايفاده ايله دئدي:
- دوز دئييرسن، گئدک درزي نين يانينا. آنجاق من آداملارين يانيندا سنه آتا دئيه جگم، يوخسا فيکيرلشرلر کي، قوجا کيشي نه موناسيبتله بو جاوان، گؤزل قيزا پالتار آلير؟..
يوسيف ائله باشا دوشدو کي، ائسفير يئنه ظارافات ائله يير، برکدن گولوب:
- نه اولار، - دئدي، - ائله اولسون...
...و ائسفير تزه پالتاري گئييب، گوزگو قاباغيندا داياناندا، او قدر گؤزل، او قدر جاذيبه دار گؤروندو کي، يوسيف هيجانلا ايره ليله ييب قيزي قوجاقلادي. ائسفير چئوير حرکتله سيويشيب، اونون قوللاري آراسيندان چيخاراق:
- نه قاييريرسان؟ - دئدي. - قوجا کيشيسن، اوتانميرسان؟..
ائسفير بونو دئييب، چايين ساحيلينه - جاوانلارين هميشه چيميب، رقص ائله ديکلري مئيدانچايا قاچدي. يوسيف يئنه ده تعيين ائله يه بيلمه دي کي، ائسفير ظارافات ائله يير، يوخسا...
... اوراداکي جاوانلار بيرينجي دفعه گؤردوکلري بو گؤزله حئيران اولدولار. مشهور زرگر زراخين ارکؤيون اوغلو اونو رقصه دعوت ائله دي و ائسفير چوخدان حسرتينده اولدوغو بو رقصي ائله مهارتله، ائله جاذيبه دارليقلا ايفا ائتدي کي، قيزلار پاخيلليقلا قيسقاندي، اوغلانلارين ايسه هاميسي اونا وورولدو...
يوسيف ده کناردان او گؤزل قيزا باخيب او قدر حئيران اولموشدو کي، آللاهدان ائده جگي ايکينجي خواهيشي ده ياديندان چيخارميشدي.
آخشام دا زرگر زراخين اوغلو گليب، يوسيفه اهميت وئرمه دن قيزي قوناق آپاردي.
زراخ چوخ حؤرمتلي و دؤولتلي بير زرگر اولدوغوندان، يوسيف قيزين گئتمه سينه مانع اولماغا جسارت ائتمه دي. آما يامان عصبي لشدي. ائسفير گلنده اؤزوندن چيخيب:
- بو نه حرکتدي؟ - دئيه قيشقيردي. - اريني ائوده قويوب، ياد اوغلانلا قوناق گئديرسن؟
ائسفير هئچ حاليني پوزمادان:
- بس نئيلگيم؟ - دئدي. - قوجا کيشيسن، سنين يانيني کسديريب اوتورماياجاغام کي، جاوان قيزام.
يوسيف نه قدر ائله ديسه، قيزي جاوان اوغلانلاردان اوزاقلاشديرا بيلمه دي. ائسفير بير ار کيمي ده اونون ياخينليغيني ردد ائتديکده يوسيف دئدي:
- آخي من آللاهدان اؤولاد ايستمه لييم.
ائسفير دئدي:
- قوجا کيشيسن، نئيله ييرسن اؤولادي!
يوسيف يانيب تؤکوله رک، بيردن-بيره او قدر حيرصلندي:
- يا آللاه، - دئدي. - سن بو ائسفيري آيي ائله! (نه اوچون محض آيي؟ دئمک چتيندير...)
بو دا ايسرايل اهلي يوسيفين آللاه-تعالي دان ايکينجي توقع سي اولدو.
چاي قيراغينا گلن جاوانلار تعجوبله گؤردولر کي، گؤزل قيز بيردن-بيره يوخ اولوب. اونو دا گؤردولر کي، بو يئرلرده بير آيي پئيدا اولوب، سحردن-آخشاماجان گليب يوسيفين قاپيسيندا ياتير. اؤزو ده هئچ کسه توخونمور. ائله بيل کي، هئچ کسي گؤرمور.
آيي يوسيفين باغچاسيندان کنار هئچ يئره گئتميردي. بوتون گونو حَيَط قاپيسي نين قاباغيندا اوتوروب، گؤزلريني زيلله ييردي ائوه. سانکي يوسفين هئچ بير حرکتيني گؤزدن قويماق ايستميردي. يوسيف حيرصله نيب اونا قيشقيردي:
- نييه چيخيب مئشه دکي قوهوملاري نين يانينا گئتميرسن؟
آيي ايسه سوساراق بوتون گونو ائلجه باخيردي و اونون آيي گؤزلري نين درينليگينده کئچمک بيلمه يه ن بير کدر وار ايدي. يوسيف آجيقلي-آجيقلي گتيريب اونو قاباغينا يئمک قويوردو. بير گون ده لاپ اؤزوندن چيخاراق دئدي:
- من هر گون سنه بال، آرمود، قوز تاپيب وئره بيلمرم!
يوسيف خسيس دئييلدي و بو سؤزلري ده خسيس اولدوغو اوچون دئميردي. بو سؤزلردن سونرا آيي داها يوسيفين قويدوغو يئمکلري يئمه دي. بو ايسه يوسيفي داها چوخ پريشان ائديردي.
آيي نين هر گون ائوي نين قاباغيندا اوتوروب، مظلوم-مظلوم اونا تاماشا ائتمه سي يوسيفين اورگينه تاثير ائديردي. اونا گؤره ده يوسيف حيرصلندي، يانا-يانا آيييا دئدي:
- نه وار؟ نييه يازي-يازيق باخيرسان؟ آللاه منيم آرزوملا سني گؤزل ائله ينده نييه بيردن-بيره ائله ظاليم اولدون؟ نييه فيکيرلشمه دين کي، آخي يوسيف او گؤزلليگي سنه قايتارماق اوچون قيرخ ايل هر گون آللاها دوعا ائله ييب؟ آللاهين کؤمکليگي ايله سندن اؤولاد گؤزله ييب! هه؟! نييه دينميرسن، ظاليم، وفاسيز قادين؟
نهايت، بير گون زرگر زراخين ارکؤيون اوغلو گليب يوسيفدن سوروشدو:
- بس سنين گؤزل قيزين هارادادير؟
يوسيف انجير آغاجي نين کؤلگه سينده اوزانان آييني گؤستريب غضبله دئدي:
- اودور ائي!..
زراخين ارکؤيون اوغلو حيرصله نيب دئدي:
- آخماق قوجا، مني اله ساليرسان؟!
او «آخماق» سؤزو سانکي يوسيفين اورگينده بو اوغلانا قارشي قاينايان غضبه، نيفرته يول آچدي. يوسيف ايره ليله ييب اوغلانا سيلله ووردو. زراخين ارکؤيون اوغلو گوجلو جاوان ايدي. عؤمرونده بيرينجي دفعه سيلله يئييردي. بير الي ايله يوسيفين خيرتدگيندن ياپيشيب، او بيري الي ايله ده سيللله مه يه باشلادي. بو زامان آيي قالخيب اونلارا ياخينلاشاراق، پنجه سي ايله اوغلاني ووروب کنارا توللادي. اوغلان برک يئره ديدي، قالخيب داروازادان چيخماغا دا ماجال تاپماياراق حاصاردان توللانيب قاچدي. سونرا آيي دينمزجه گليب يئنه ده او انجير آغاجي نين کؤلگه سينده اوزاندي. يوسيف ده اونون ياخينليغينداکي کؤهنه تاختا کتيلده اَيلشدي.
اون بئش گونلوک آي دونياني ساکيت، مئهريبان بير نورا غرق ائتميشدي.
آيي ايله اينسان بير-بيرينه باخيردي. بيردن نه اوچونسه يوسيفي آغلاماق توتدو. و اونا ائله گلدي کي، آيي نين آي ايشيغيندا ايشيلدايان بالاجا گؤزلرينده ده ياش گؤروندو.
و بني-ايسرايلين مؤمين بنده سي يوسيف اللريني گؤيه قالديراراق:
- ائي بؤيوک آللاه! - دئدي. - سن ائسفيري منيم قيرخ ايلليک آرواديم اولدوغو واختينداکي شکلينه قايتار!..
بؤيوک آللاه يوسيفين اوچونجو آرزوسونو گؤزله ييردي. اونا گؤره ده ائسفيري نئچه آي بوندان اولکي شکلينه سالدي.
گون ايشيغيندا آلماز کيمي پاريلدايان او چايين ساحيلينده يئنه او قوجا کيشي و قاريسي ايدي.
بئله ليکله، داشا گيرن کاهين ايبراهيمين دئديگي کيمي، آللاه بني-ايسرايل يوسيفين قيرخ ايلليک عيبادتي عوضينه وعد اولونموش اوچ ديلگي نين اوچونو ده يئرينه يئتيردي.
يازاز: ايلياس افندي اف
كوچوره ن: علي دهقاني آذر
دوشونجه، ادبيات و اسطوره دونياسينا يئني بير باخيش آچيسي آختارانلارا خوش گلدينيز دئييب و اونلارين ايش بيرليگين گوزلوروك.