تئز-تئز پيس حاديثه لر اولور. گاه قوهوملارين باشينا بدبخت حاديثه لر گلير. گاه قونشولارين. تئلئويزيوندان آلديغيميز بد خبرلرينسه آردي-آراسي هئچ کسيلمير. قولاق هر گون بد خبر ائشيتمه سه  کار اولور.  

بيز شهردن گليب ائوه چاتاندا گئنيش کوچه نين اورتاسيندا ياس چاديري قورولدوغونو گؤردوک. عادي بير حالدي. اينسانلار دوغولمالي، هره نين بير زاماني چاتديغيندا اؤلمه ليدير. قوجالاري جاوانلاشديرماق کيمي فؤوق العاده بير يئنيليک هله گلمير حکيملرين اليندن. هئچ وئجيمه ده آلماديم.  

او قدر سويوقدو...ماشيندان چيخيب اؤزومو ائوه دورتمک ايسته ييرديم. دوشرکن پلاشيمين اتگي ده پالچيغا باتدي، احواليم کورلاندي. 

ساکيتليک ايدي. آغلاشما سسي ده دويولموردو. يوز فايز اؤلن قوجا ايدي. يا آرواددي، يا کيشي... نه فرق ائدردي کي...  

بللي، جولوق-جوجوغو بؤيودوب، بويا-باشا چاتديرميش بيري. حتّی بلکه اؤولادلاري سئوينيبلر اوندان جانلاريني قورتارمالارينا. گونونو گؤرموش، دؤورانيني سورموش. آللاه رحمت ائلسين.  

بيز محلله يه تزه کؤچموشوک. کيرا نيشين اولدوغوموزدان گلدي-گئدريک دئيه قونشولار بيزيمله ماراقلانمازلار. غوروروموزدان بيز ده اونلارلا.  

ائوه گيرنده چؤلده کيندن آرتيق اوشودويومدن دئر-دئر دئيينمه يه باشلاديم ياغيشين، قارين، قيشين دالينجا. اوشاقلار هره سي بوزوشوب بير طرفده داياندي. اؤزوم بير ياندا. گاز کسيلمه ميشدي. آما کسيلسه ايدي، بوندان ياخشييدي. کؤز کيمي کورون-کورون يانيردي. سليمله کؤمکلشيب بير-ايکي اودون گتيريب آتديق سوبايا. گازي دا يئرلي-ديبلي باغلاديق. رايون جاماعاتي اؤيرنجه ليدي، هامي بيلير، قار کي، ياغدي، گاز بئله وئريلير. اونا گؤره هله پاييزدان هره ايمکاني چاتديغي قدر اودون تداروکونو گؤرور.  

اوتاق قيزديقجا جانيميز قيزيشدي. ائوين چؤلدن خبري اولمادي. 

ائرته سي گون گونورتا کوچه نين اورتاسيندا زورنا-بالابان سسي اوجالدي. گونورتا يئمگي اوچون اوتورموشدوق. دئديم: 

-تويدو. نه واختدي تويا گئتميريک. بوردا دا ياديق. توي اوزونه حسرتيک.  

من کي، گيلئيلنمه يه باشلاديم... قان قارالمايينجا دايانميرام. اودو کي، سليم منه فيکير وئرمه دي.  

بو واخت آغلاشما، چيغيريشما سسي قوشولدو زورنا-بالابان سسينه. آخشام گؤردويوموز ياس چاديري ياديما ايندي دوشدو: 

-بو ندي؟ آغلاييرلار، يوخسا گولورلر؟ –بو دفعه  سليم سوروشدو.  

کيشينين هيم-جيمينه بند اولمادان پنجره ني آچديم. سوغانچا قوخولو سويوق کولک دولدو ايچري. يئمک بيشيريرديلر. تابوت گئديردي اؤنده. آرخاسيندا بير سورو قارا پالتارلي آغلار قادين، کيشي. و چالغيچيلار.  

تئز پنجره ني اؤرتدوم. باياقدان -پنجره ني آچما- دئيه اؤزونو ديدن سليم باشييلا –نه وار؟ –دئيه ايشاره ائله دي.  

- جاواندي بو اؤلن، آي سليم. قاباقدا گئدن، الينده شکيل توتان يقين آناسي قارابختدي. واي...واي... واي. گئديب ديرسن سن ده. نه اولسون کي، تانيميريق بير-بيريميزي. بلکه جبهه دن گليب. يا دا ورمميش. اورگيم سيخيلدي لاپ. آللاه کنار ائلسين. هئچ بير آنايا-آتايا اؤولاد داغين گؤسترمه سين. ايتين-پيشيگين اولوم آي آللاه. قوربانين اولوم آي آللاه، سن اؤزون بالالاريمي پناهيندا ساخلا- بونو دئييب اوغلاني من قوجاقلاديم، قيزي سليم.  

سليم لوخبرله گلدي.  

سن دئمه، اؤلن نؤوجاوان نه جبهه ده هلاک اولوبموش. نه ده ورمميش. طالعسيز بير تصادوفه قوربان گئديب. حئکايه يازسام، کيمسه اينانماز.  

بيز شهرده اولان گونون گئجه سي شرطي آدي زاور اولان گنج، گؤروشدويو قادينين بئش مرتبه لي بينانين آلتينجي مرتبه سينده کي  ائوينه گئدير نؤوبتي دفعه . يوز اؤپوب بير ديشله ييب سئويشديکلري دم شرطي آدي آنار اولان قيزين يولداشي ائوه قاييدير. قاراوولدا ايشله ديگي بئش-آلتي ايلده بو ايلک دفعه يميش کي، آنار بانکي باشلي-باشينا بوراخيب گئجه ائوه گليبميش. قولاغينا شاييعه لر چاتيبميش. تخمينيله قانلي- دوشمن آناسي دولدوروبموش قولاغيني. ويدي-ويدي. دير-دير. آنار بئزيبميش. تهمينه دن خبرسيز ائوين آچاري نين بير نوسخه سيني چيخاريب قويوبموش جيبينه. قاپيني نئجه آچيب ائوه گيرديگيندن عاشيق-معشوقلارين خبري ده اولماييب.  

گؤردويو منظره دن شوک کئچيرن آنار مطبخه جوموب چؤرک بيچاغيني قاپيب. بو واخت تلم-تله سيک شالواريني اَينينه سوخان زاورون اوستونه جوموب. قورخودان اورگي آغزينا گلن تجروبه سيز گنج عاشيق اؤزونو پنجره دن آشاغي آتيب. عمللي-باشلي فاجيعه . 

دونندن بري آغلار قالان آناسينا يانيرديم. ايندي ده مؤحکم غضبيم توتدو. گئجه گيزلي-گيزلي دوروب يار يانينا گئدن اوغلونو نييه توتوب ائولنديرمه ييب بو آرواد رايون يئرينده؟! باشينا دا بئله قضا و-قدر گلدي.  

تهمينه يه نولاسيدي. اري نين شوک ايچينده ائيواندا قورويا-قاجييا زاورون دالينجا بويلانديغيني گؤرجک، پاليني-پالتاريني گئيينيب، سوروشوب آرادان چيخيب. او گئدندي، تاپيلمير. ايندن بئله ها تاپيلسين. آناري توتوب باسيبلار ايچري. زاور دونندن قبيرده دي. بيرجه تهمينه کئفده دي.  

ياس يئرينه گئتديم گئتمگينه. زاورون آناسيني گؤردوم گؤرمگينه. آما اؤزومو گوجله ساخلاديم آروادين باش-گؤزونو يولماقدان کي، بو ياسا چکديگين خرجي ائله اوغلونون تويونا چکيدين ده. بير داش لا ايله ايکي قوش ووروب اوتوردون ايندي.  

-ايسته ديگي واردي... آلماديم. کئچن ياز قيز چيخدي گئتدي اره. 

گؤروم ياريماسين اونو. گؤروم اونو ار اوزونه حسرت قالسين. آز هاردان سئويردي او زاورومو؟اناسينا، باجيسينا باخمازدي. سئوسيدي گؤزلردي. ايلان وورسون مني. ايلان وورسون مه نيييي!!! – دئييب آرواد ايکي الين آتدي ايکي ياناغينا. من ايکي اليمله گؤزلريمي قاپاديم. 

   

سئوينج پروانه 

كوچوره ن: علي دهقاني آذر