دوشونجه و ادبيات دونياسينا يئني باخيش

قارا شهرين اوجقار گئجه قوندو محلله لرينده کيرايه ده قالان طلبه لردن بيري، طيبب اينستيتوتوندا اوخويان اوروج، گونلرين بير گونو اؤزويله بيرليکده بير گنج قيز گتيرميشدي. دؤرد همکندلي راضيليغا گلديلر، قيز اونلارلا بيرليکده ياشاياجاقدي.

اوروج ياشجا هاميسيندان بؤيوک ايدي. بو ائوي ده او کيرايه ميشدي. قوهوملاري اولان بو اوشاقلارا دا يانيندا يئر وئرميشدي.

آلمازا سيغينماق اوچون يئر لازيم ايدي. اوجقار داغ رايونلاري نين بيريندن ائولنمک آدييلا قاچيريلميشدي. دوغماديغي اوچون آتيلميش، ائوه دؤنمه يه اوزو اولماميشدي. اوروجلا بيرليکده قالماغا راضي ايدي. عئيني زاماندا ائوين عومومي تميزليک ايشلرينه باخاجاق و يئمکلريني بيشيره جکدي.

دهشتلي سارسينتيلار کئچيرميشدي بو قيز. طلبه لرين يانيندا راحاتليق تاپدي. تئزليکله اؤزونو توپلادي، غئيري-عادي بير گؤزله چئوريلدي. هوسله طلبه لرين يئمکلريني بيشيرير، پالتارلاريني يويوردو. بو يئني حيات هاميسي اوچون ماراقلييدي.

قادين ائودن قووولاجاغي نين قورخوسونو چکيردي. گنجلرين بوتون ايستکلريني جانلا-باشلا يئرينه يئتيريردي. طلبه لردن بيري – نووروز قادي نين بو ضعيفليگيني تئزليکله باشا دوشدو. ائوده آلمازلا تک قالاندا اونونلا ياتماق ايسته ديگيني سؤيله دي. بونون سيرر اولاراق قالاجاغينا آند ايچدي. آلماز موقاويمت گؤسترمه دي. اونلار بيرليکده سئکسله مشغول اولدولار.

بو حال عادت شکليني آلدي. نووروز بير بهانه ايله درسدن تئز قاييدير، بعضا هئچ درسه گئتمير، دوستالري نين گؤزوندن اوغورلانيب گئري قاييديردي. 18 ياشلي کند اوشاغي حياتي نين ايلک قادينييلا آج گؤزلوکله سئويشيردي. اونون بو چيلغينليغي آلمازين دا خوشونا گلميشدي. بو تجروبه سيز يئني يئتميله سئوگي اويونو اويناماق اَيلنجه ليگدي. آنجاق هر دفعه ، بئله اولماز، بيزي گؤررلر، بيابير اولاريق، اوروج مني ائودن قووار، دئييردي. نووروز، قورخما، اگر اوروج سني قووسا اؤزوم آيريجا ائو توتارام، سني کوچه ده قويمارام، بيرليکده قالاريق، دئيه جاواب وئريردي.

نه قدر احتياطلي اولسالار دا بو سيررين اوستو آچيلدي.

گونلرين بير گونو، نئجه اولدوسا، نووروزون اؤزوندن ايکي ياش بؤيوک اولان عميسي اوغلو ايمان، گؤزله نيلمه دن ائوه تئز قاييتدي. ايچري گيرنده هر ايکيسي ائحتيراصين زيروه سينديدي، يالنيز ايشلريني گؤروب قورتاراندان سونرا ايمانين دايانيب اونلارا باخديغي نين فرقينه وارديلار.

ايکي عمي اوغلو راضيليغا گلديلر، بو مساله اؤز آرالاريندا قالاجاقدي. آنجاق آلماز تک گونلر نووروزون، جوت گونلر ايمانين اولاجاقدي. آلمازين راضيلاشماقدان باشقا يولو يوخ ايدي. بو ائودن گئتمک، کوچه لره دوشمک ايستميردي، چونکي بورادا هر کس اونو سئويردي، يئمک بول ايدي، اوتاقلار ايستييدي. هئچ اولماسا ياز ايمتاحانلارينا قدر بورادا باشيني گيرله مک حاقيندا دوشونوردو.

لاکين، ايمان بوتون کند جاوانلاري کيمي ساده لؤوح ايدي. عئيني قروپدا اوخودوغو طاهيره آلمازلا ياخينليق ائتديگيني آچيب دانيشدي. طاهير، قاغاسي نين گورونا آند ايچيب بو صؤحبتين آرالاريندا قالاجاغينا سؤز وئرميشدي. او، دوغرودان دا کيمسه يه دانيشمادي بو صؤحبتي، سؤزونون اوستونده دوردو. آنجاق ايماني ديله توتدو، گونلرين بيرينده اونيوئرسيتئته اوغراماييب ائوه قاييتدي. آلماز اونونلا ياخينليق ائتمک ايستمه دي. بئله اولاندا طاهير سسيني قالديردي، هامييلا ياتيرسان، منيمله ده يات دئدي. آلماز تسليم اولدو.

طاهيرين قادينلا ياتماق تجروبه سي وار ايدي. دوستلارييلا بيرليکده 10 مانات باهاسينا قاراباغ اوتئلينده کي فاحيشه لرين يانينا چوخ گئتميشدي. آنجاق آلماز او ياشلي فاحيشه لردن دئييلدي، 22 ياشي واردي، پيشيک کيمي قيوراق ايدي.

چوخ کئچمه دي، نووروزلا ايمانين نؤوبه ليليک آنلاشماسينا طاهير ده قوشولدو. آرتيق احتياط ائده جکلري تک بير آدام قالميشدي، او دا اوروج ايدي. بعضا سئوگي اويونو آخشام ساعاتلارينا قدر سوروردو، دوستلاردان بيري قاپيدا دايانيب کئشيک چکير، اوروج کوچه قاپيسيندا گؤروننده هر کس هئچ نه اولماميش کيمي اؤز يئريني توتوردو.

آخشاملار اوروجلا آلماز اؤز اوتاقلارينا چکيليردي. بو زامان اوروجون دا کندچيلرينه بير سؤزو اولوردو: بيردن آتام گلسه منه خبر وئرين. بئله اولارسا، آلماز پنجره دن قاچيب حَيَطه دوشمه لي، ائوين آرخاسينداکي آنباردا گيزلنمه لي ايدي.

اوروجون آتاسي صمدين بئله قفيل گلمه لري اولوردو. اوشاقلار آجيندان اؤلر دئييب کنددن سووقات گتيرردي. آرتيق، چييلک چيخميشدي، هر آن بازارا مال گتيره بيلردي.

اوروجو طيبب اينستيتونا پوللا سالديرميشدي. وار-يوخدان چيخميشدي. اوروجون طيبب اوخوماغا هوسي يوخ ايدي. گوج آتايا دوشموشدو. ايمتاحانلارا پول لازيم ايدي. گئجه-گوندوز ايشله ييردي. پامبيق بريقاديري ايدي. جاماعاتين يؤميه سيندن کسيب اوروجون يولوندا قويوردو. پاييزدا روسييايا نار، قيشدا ليمون آپاريردي. اؤزوندن کيچيک ايکي قارداشي و بير باجيسي اوروجون تحصيلينه سفربر اولموشدو. آتانين آلماز حاديثه سيندن خبر توتماسي اوروج اوچون اصل فلاکت ايدي. دفعه لرله اولموشدو، هانسيسا بير سهو حرکتينه گؤره اوروجون باشيني يومروغا دولاميشدي. بير دفعه اوروجا يومروق آتاندا صمدين قولو بورخولوب چيخميشدي. بير آي ساريقلي گزدي. بو ياشلي آدام هئچ ندن عصبلشيب جوشاردي، تضييقدن بوغازي نين دامارلاري شيشردي. اوروجون قورخوسو عبث دئييلدي.

آلماز اوشاغا قالميشدي. كيلاس سئزونو باشلاياندا قارني نين شيشي عمللي-باشلي بيلينيردي. بو خبر اورتايا چيخان گوندن ائوده قانقاراچيليق ياراندي. نووروز ايمتاحانلاريني وئريب درحال کنده اکيلدي. طاهير باشقا بير قوهومونون ائوينه داشيندي. ايمان اسکي ائوده قالماغا داوام ائديردي، آنجاق آلمازلا آراني سويوتموشدو. هله اوروج! بؤيوک بير تلاش ايچريسينده ايدي. بو ايشين اوستو آچيلارسا نه ائده جکدي. سونونجو کورسدايدي، بو گون صاباح تعييناتيني وئره جکديلر. آرتيق آدام تاپيب دانيشميشديلار، اؤز رايونلارينا گؤندره جکديلر اونو. آتاسي بو ايش اوچون بير توربا پول وئرميشدي. ايندي بو قيزي رايونا نئجه آپاراجاقدي. بو اوشاغي نه ائده جکدي.

سينيرلر گريلدي. بير گون معرکه قوپدو. اوروج آلمازي دؤيمه يه باشلادي. اوتاقدا تکجه ايمان واردي. اوروج آنا سؤيوشو قويوب اونو ياخينا بوراخمادي. تپيکله قيزين قارنينا-قارنينا ووروردو. آنا بطنينده کي اوشاغين قصدينه دورموشدو آچيق آشکار. نهايت ايمان غئيرته گلدي، آلمازي اوروجون اليندن آلدي. آلماز اشيالاريني آلمادان جانيني گؤتوروب قاچدي. قارا شهرده کي نيظامي پارکيندا سکاميادا اوتوروب قالدي. بوراداجا اونو يوخو توتدو. آغزيندان شورلايان قاني يئره توپورموشدو. امجکلري دولو بير ايت گليب بو قاني يالادي.

تکرار ائوه قاييتدي. ميليسه شيکايت ائدجم دئييب اوروجا حده-قورخو گلدي. اوروج آتاسي دستيري باغيرماغا باشيلادي، سيکدير، هارا گئديرسن گئت دئدي. آلماز ساکيتجه دؤنوب اوزاقلاشاندا سانکي اوروجون عاغلي باشينا گلدي، خلوتجه ايماني قيزين دالينجا گؤندردي.

بير نئچه گون کوسولو دولانديلار.

ايمان ايمتاحانلاري تاماملاييب رايونا يوللاندي.

آلماز باريشاجاقلارينا اوميدلي ايدي. يئمک بيشيرير، ائو ايشلرينه باخيردي. اوروج ائوه گئج قاييداندا کوچه قاپيسيندا دايانيب يولونو گؤزله ييردي. حياتي قارا دومانا بورونموشدو. باشينا نه لر گله جگيني واهيميله دوشونوردو. اوشاغي اولماديغي اوچون بلالار چکميشدي، عاييله سي داغيلميشدي. ايندي قارنينداکي بو ياورودان آيريلماق ايستميردي. اوروجون آبورت تکليفلريني ردد ائديردي. سن مني آتسان دا من اوشاغيمي آتماياجام دئييردي. آللاهدان قورخوردو.

آخيردا راضيليغا گلديلر. اوروج رايوندا آلمازا آيريجا ائو توتاجاقدي، اؤزو ده آرادا-بير گليب گئده جکدي، دولانيشيقلارينا کؤمک ائده جکدي. اوروج ايستسيدي اؤزونه آيريجا حيات قوروب ياشايا بيلردي. آلماز بونا راضي ايدي، تکي کوچه ده قالماسين.

ائله ده اولدو.

اوروج طيبب اينستيتونو بيتيرميش، تعييناتيني اؤز دوغما کندينه آلميشدي. آنجاق بونا سئوينه بيلميردي. بير آي سونرا دونيايا گله جک اوشاق حياتيني قارا رنگه بوياميشدي.

رايون مرکزينده ائو توتوب آلمازي يئرلشديردي. پول وئردي. هر هفته گليب گئدجم دئدي. کنده ياريم ساعاتليق يول واردي. بير هفته سونرا طاهيرله بيرليکده گلديلر. توربادا کارتوف-سوغان گتيرميشدي. 10 مانات پول وئردي. سونراکي گونلرده اوروج بير دفعه ده اولسون گليب آلمازا باش چکمه دي. آلماز گرگين گونلر ياشاييردي. پولو قورتارميشدي. قونشولاردان چؤرک ديله نيردي. بير آيين تاماميندا ائو صاحيبي کيرايه پولونا گلدي. قادي نين بو گون صاباح ياتاجاغيني گؤروب مؤهلت وئردي.

دوغوش ساعاتي گلنده قونشولار ماما چاغيرديلار. خسته خانايا وئرمه يه پول يوخ ايدي. قيزي اولدو. آديني سولماز قويدولار. آنجاق آلماز اؤزو گونلر کئچديکجه سولوردو. قونشولار اولماسا آجيندان اؤله جکدي.

گونلر کئچدي. گوج توپلاييب آياغا قالخدي. کنده يوللاندي. کند آوتوبوسوندا هامي بيري-بيريني تانييير. کيمه گئديرسن سوروشدولار. من اوروجون آروادييام دئدي، بو اوشاق دا اونوندور. اوروجون باجيسي آوتوبوسدايميش. واي-شيون قوپارتدي، کؤپک قيزي، منيم قارداشيما شر آتيرسان دئدي. يانينداکي رفيقه سييله سوپورله ييب آلمازي يئره سالديلار. آوتوبوس يولا دوشدو. آلماز قوجاغيندا چاغا آسفالتين اورتاسيندا قالدي.

سحري گون اوروج پئيدا اولدو. صؤحبت کنده چاتميشدي آرتيق. آل بو پولو، چيخ گئت بو شهردن دئدي. آلماز گؤزونون ياشيني تؤکوب آغلادي. اوشاغيمي يئتيم قويما، باشينا دؤنوم، آياغي نين آلتيندا اؤلوم دئدي. اوروجون صيفتينده سرت بير ايفاده واردي، هئچ يومشالانا اوخشاميردي. آتام بيلسه هر ايکيميزي اؤلدورر، مني بدبخت ائلمه، ايتيل بو شهردن، هارا گئديرسن گئت دئييب قاپيني چيرپدي.

آلماز طالعيي ايله باريشميشدي. بونون بير آلين يازيسي اولدوغونو دوشونوردو. آللاه يوخ يئردن قاپي آچاندير دئييردي. شهر کناريندا خاراباليقلار واردي. اورادا اؤزونه سيغيناجاق تاپا بيلردي دئميشديلر. ائودن چيخيب هر کسين گؤي زاوود دئديگي ايستيقامته يؤنلدي. سووئت واختلاريندان قالما بؤيوک بير زاوود ايدي، آنجاق ايندي ايشلک دئييلدي. زاوودون تکجه بئتون کارکاسلاري قالميشدي. شهردن خئيلي آرالييدي. تورپاق يوللا ايره ليله ييردي. ايره ليده سيرايلا دوزولموش واقونلاري گؤزونه توتوب گئديردي. ايتلر جومماسين دئيه الينه آغاج آلميشدي.

کيمسه سيز بير يئر ايدي بورالار. آلمازين اورگينجيدي. اينسان اوزو گؤرمک ايستميردي. سيغينماغا بير يئر اولسايدي.

سيرايلا دوزولموش کؤهنه واقونلارين بيرينده حيات واردي.

ايت هوردو. قيرخ ياشلاردا بير کيشي گؤروندو، آياغيني چکيردي، اوزونو توک باسميشدي. صيفتي گونشدن قاپ-قارا يانميشدي. کيمي آختاريرسان، سوروشدو. هئچ کسي آختارميرام، يئر آختاريرام، دئدي، يولونا داوام ائتدي. کيشي آرخاسينجا باخا-باخا قالدي. سوزولموش پالتاريندان، داغينيق ساچلاريندان بو قادي نين حياتين ديبينده اولدوغو بللي ايدي.

آلماز اطرافي دولاشدي، اويغون بير يئر تاپا بيلمه دي، گئري قاييدارکن يولو يئنه واقونلارين يانيندان کئچيردي. کيشي باياقکي يئريندجه دايانيب، ائله بيل اونون يولونو گؤزله ييردي.

- ايسته ييرسن گل منيم يانيمدا قال.

اوغراش آداما اوخشاميردي. آنجاق آلماز بو گؤزله نيلمز چاغيريشا جاواب وئرمه دي. يولونا داوام ائديب گئتدي. آجيندان قارني قورولداييردي. باشي هرله نير، آياقلاري سيزيلداييردي. بير قارين يئمک آرزوسويلا گئري قاييتدي. واقونون کؤلگه سينده قويولموش کؤهنه آوتوبوس اوتوراجاغينا چؤکوب باييلدي.

کيشي تلاشلا سو گتيردي. آز قاليردي قيزي قوجاقلاسين، باشينا سيغال چکيب تسللي وئرسين. آنجاق بونو ائده بيلميردي. اؤزونو ايتيرميشدي.

آجليق اوشاغا دا اثر ائلميشدي. بيردن-بيره آغلاماغا باشلادي. قادين دؤشونو چيخاريب اوشاغين آغزينا سالدي. آنجاق دؤشونده سود يوخ ايدي. تکليف گؤزله مه دن اليني اوزاديب يانينداکي وئدره دن بير خييار گؤتوردو. آج گؤزلوکله ديشينه چکيب يئمه يه باشلادي. يالنيز بوندان سونرا کيشي مساله نين نه يئرده اولدوغونو باشا دوشدو. درحال يئمک دالييجان واقونا گيردي، اورا-بورا وورنوخوب بير شئيلر گتيردي...

داريسقال واقون. بورا آلمازين يئني منزيلي ايدي. ايچريده هر جور زير-زيبيل واردي. کسکين بئنزين قوخوسو گليردي. ديواردا گنج عاييله نين عکس اولوندوغو فوتو واردي. کيرلنميش، اوستونو زيل باسميشدي. فوتاداکي گنج اوغلانين ساققاللي بير قوجايا چئوريلديگينه اينانماق اولموردو. آدي نصيب ايدي. عاييله سيني موحاريبه ده ايتيرميشدي. دؤيوشده يارالانيب شيکست اولموشدو. اينسانلارا قاريشميردي. بورادا ترکي دونيا حيات ياشاييردي.

آلمازين باشقا چاره سي يوخ ايدي. اورتاسي چؤکموش بو ياتاقدا نصيبله بيرليکده ياتمالييدي. سانکي ائله بئله ده اولمالييدي. چوخ سؤز دانيشمادان بيرليکده ياشاماغا باشلاديلار. بير گون واقونون ايچينده سليقه-ساهمان ياراندي. بير هفته سونرا نصيب ساققاليني قيرخدي. ائوه اوتو آليندي.

واقوندان بير آز آراليدا نصيبين تروز بوستاني واردي. باديمجان بول ايدي.

سحرلر ائودن چيخيب بئش يوز مئتر آراليدا، اوللر زاوودون ايستيفاده سينده اولان، اينديسه صاحيبسيز قالميش مازوت چنلرينه گئدردي. کوب شکلينده يارييا قدر يئره گؤمولموش بو چنلرين اوزرينده کيدليکدن ايچرييه گيرر، ايللر کئچديکجه قاتيلاشيب سرت کوتله حاليني آلميش، ساققيزا دؤنموش مازوتو بئل-کورکله، بالتايلا قوپاراردي. گون اورتايا قدر ايکي توربا قير نصيبين دولانيشيغي ايدي. بوندان آرتيغينا گوجو چاتميردي. آغير، زحمتلي بير ايش ايدي. هر دفعه بو ايشي گؤردوکدن سونرا ال-اوزونو، بدني نين قيرا بولاشميش يئرلريني بئنزينله يومالي اولوردو. هر هفته نين جومه گونلري موشتريلر ماشينلا گليب توپلانان قيري داشيييرديلار. بير توربانين قييمتي 10 مانات ايدي.

آخشاملار سئويشمه زاماني آلماز نصيبين بدنينده کي قير لکلري نين ياخشي تميزلنمه ديگيني اؤز بدنييله حيسس ائديردي. آنجاق بونو عئينينه آلميردي. بو شيکست کيشي نين يانيندا اؤزونو قورخولاردان اوزاقدا حيسس ائديردي.

واختاشيري نصيبين يارالاري اويانيردي. ايفليج اولوب يئريندن قالخا بيلميردي. بئله اولاندا آلماز اؤزو بئل-کولونگو گؤتوروب چنلره گئديردي.

هر دفعه چنلري ساييردي... 9، 10، 11. نئچه ايلليک ايش وار ايدي بورادا.

آجيندان اؤلميه جکديلر.

بو تورپاغين ثروتيندن آلمازا دا پاي دوشموشدو.

هوسله قازيردي.

قيزمار گونش آلتيندا چنين ايچريسي تندير کيمي اولوردو.

ايشيني تاماملاييب قوپارديغي قلپه لري چؤله آتير، توپلاييب بير توربانين ايچينه ييغيردي.

قان-تر ايچريسينده ديکه ليب مازوتلو الي نين آرخاسييلا آلني نين تريني سيليردي.

گؤزل بير قادين ايدي. صيفتينه ياخيلميش قارا مازوت، نه سيرر ايديسه، اونو داها دا جاذيبه لي ائديردي.

راسيم قاراجا

كوچوره ن: علي دهقاني آذر