شکينين اوخود (ايکي معنادا آنلاماق اولار: بيرينجي، «وخوتماق» فعلينين امر فورماسي –«اوخوت»، ايکينجي، «اوخ»-«اود» سؤزلرينين بيرلشمه سي – واختيله اوخون اوجونو يانديريب آتيرديلار) کندي ياخينليغينداکي «قوشون يولو» دئييلن دره ده (اورتا عصر آلاگؤيوت ياشاييش مسکني اطرافيندا) سينه سينه بئشيک سيخميش آناني خاطيرلادان ايري داش پارچاسي واردي. خالق آراسيندا همين داشا «انا داش» آدي وئريلميش و افسانه ياراديلميشدير. دئييرلر کي، قاري دوشمنين آياقلاري بو تورپاقلارا ديمزميش. ائلين جاوانلاري تهلوکه حيسس ائدن کيمي سيلاحلانيب، آتين ترکينه قالخار، يادلارين آياقلاريني سرحددن بو يانا کئچمه يه قويمازلارميش، ائله اوجقارلارداجا بورونلاريني اووب گئري قايتارارلارميش. بو دفعه  سئل کيمي گلميشدي دوشمن، قوشونون اوجو-بوجاغي يوخويدو. ائلين الي سيلاح توتانلاري شهيد اولدولار. دوشمن هر طرفدن يئل کيمي کندلره دولوشور. قوجالار، قادينلار، اوشاقلار داغلارا سيغينديلار. اله کئچمه مک اوچون دره لره ده، ماغارالاردا گيزله نيرلر.  

بير جاوان گلين دونيايا يئنيجه گؤز آچميش کؤرپه سيني بئشيکده يوخويا وئرمک ايسته يير. اري اوغلونون اوزونو گؤرمه ميشدي. ائولري هوندور بير تپه نين اوستونده ايدي. گلين اورادا دوروب گؤزله يير کي، ائل دؤيوشدن قاييداجاق، اريني موشتوقلاياجاق. کندين آياغيندا توز دومانا قاريشاندا کؤرپه آغلاماغا باشلايير. آنا اَييلير کي، اونو اميزديرسين. توز ياخينلاشاندا گؤرور کي، گلن دوشمن قوشونودور. گلين کؤرپه سي نين آغزيني دؤشوندن آييريب سوددن کسمه يه اورک ائلمير. بئشيگي يئردن قالديريب سينه سينه قيسير و داغلارا دوغرو قاچير.  

قوشون اونون آردينا دوشور. آللاهين ايشينه باخ کي، گلينين يولو دره آغزينا ديره نير. او گؤرور کي، داغلارا سيغينا بيلميه جک. هر طرفدن دوشمنله احاطه اولونوب، بير آزدان اونون بالاسيني سينه سيندن آييريب دره يه آتاجاقلار، اؤزونو ايسه اؤزلري ايله آپاراجاقلار. گلين ائلين گؤزل قيزلاريندان بيرييدي. ناموسو آياقلار آلتينا آتيلينجا اوزونو گؤيلره توتوب يالوارير: 

-اولو گونش، مني بو ايتلره يئم ائدينجه داشا دؤندر! 

دوشمن آتليلاري سورعتله شوتويوردو. بيرده گؤرورلر کي، گلين قئيب اولدو، يئرينده ايري بير داش عمله گلدي. آتلاري ساخلايا بيلمه ديلر، هاميسي همين داشا چيرپيليب دره يه يووارلاندي.  

داش سونرالان جاماعاتين نيت يئرينه چئوريلدي. دئييرلر، او داشين آلتيندا بؤيوک بير خزينه ياتيرميش. 

شکيلي آرکئولوق م.نسيبوو «انا داش»ين ايزي ايله چوخ آختاريش آپارديقدان سونرا معلوم اولدو کي، قيزيللاري اله کئچيرمک ايسته ين آج گؤز، خبيث اينسانلار اويونلاردان چيخيبلار، ائلين ناموس، غئيرت رمزينه چئوريلن داشي پارچا-پارچا ائديبلر.

کوچوره ن: علی دهقانی آذر