اوچقون ديوارلار
ايچيمده بير قارانليق،
ايچيمده بير يوخو وار.
اوچوروملار ايچينده
اوچورام ديوار-ديوار.
سوساديم سحرلره
سوساديم ياغيشلارا
بو آرا سن ده يوخسان-
صحرادان بئتر اولدوم.
ايچيمده بير قارانليق
ايچيمده بير يوخو وار
بو يوخودان يورولدوم
بو شهرده هئچ کيمم،
بو شهردن يورولدوم
گئديرم اوزاقلارا،
سن يوخسان- من ده يوخام.
گئجيم، قارانليغام-
اؤزومده، سنده يوخام.
اليمده سويوق پيوه،
داماغيمدا سيقارا.
چکيلمه ميش شکيلم-
آسيلميشام ديوارا.
قارانليغام، گئجيم-
اؤز ايچيمدن قوپموشام
رئکلام بزکلرينه
مئترو ايشيقلارينا
قاريشميشام، هوپموشام.
شهر مني اريتدي-
ايتيرميشم اؤزومو-
بو يان-يانا دوزولو
بو اوس-اوسته ييغيلي
مرتبه لر، بينالار
دبدبه لر، زينالار…
سفسفه لر ايچينده
بو تيخاجلار ايچينده
بو توخ-آجلار ايچينده
اؤزومو ده ايتيرديم
سؤزومو ده ايتيرديم.
سن ده يوخسان…
سويوقسان…
بو دا سونوم، سونلوغوم-
شهر مني اريتدي-
گئديرم… اوزاقلارا
اوردا ياغان ياغيشلار
اوردا دوغان گونشلر
بلکه مني کيريتدي.
بلکه…
مني…
کيريتدي…
********************
گئرييه چکيلمه يو
يئنه بير تهلوکه قوخوسو چؤکدو ايچيمه
يئنه قوربان وئرمه لي
گئرييه چکيلمه يو
چکيلسم کؤرپولري اوچورمالي
ديشيمه چکمه لي قومبارالاري
ساواشين سنگر دوداقلاريندا
سون نغمه کيمي اوخونمالي
بيتمه لي...
اؤلمه لي صيفتيمدن بير قايا ميثالي قوپان
گؤز ياشيما
اؤلن قارداشيما آند اولسون
يئنيدن باشلامالي حياتي
يئنيدن ياشامالي
تهلوکه آنام اولسون
يئنيدن دوغمالي بو ساواشدان
گئرييه چکيلمه يو
حياتي باغرينا باسمالي
دينله مه لي تورپاغين سسيني
مني چاغيران تورپاغين
اولدوزلارا ياخين
گونشه ياخين
بير يئردن باشلامالي
دوشونجه، ادبيات و اسطوره دونياسينا يئني بير باخيش آچيسي آختارانلارا خوش گلدينيز دئييب و اونلارين ايش بيرليگين گوزلوروك.