نريمان حسنزاده
سون زامانلار عرضينده نريمان حسنزاده نين اينترنتدن تاپيب ييغديغيم شعرلري سيزلرله پايلاشماق فيکرينه گلديم.
****
1)
ائله دايانيرسان، ائله باخيرسان،
ائله بيل قارشيندا قورو بير داشام.
ايپک ساچلاريني بير واخت اوخشايان
ائله بيل هارداسا من اولماميشام.
سني دوستلاريملا، تانيشلاريملا،
من تانيش ائدرديم نه واختسا بير-بير .
ايندي اؤزگه لري، ياد احتيراملا،
دئييرلر تانيش اول…
نه غريبه دير ؟!
يوخودا گؤرردين نه واختسا هر دم،
يولومو گؤزلردين يوللاردان اوزاق.
من سنين يوخوندان چيخيب گلميشم،
بو دا بير يوخودور، گل تانيش اولاق.
قولونا گيررديم… بو، ياديندادير،
گئدرديک … يولوموز، آرزوموز شريک.
قولوم قوللاري نين لاپ يانيندادير،
توخونسا، بيز ايندي عذر ايسته ييريک.
هاياندا اولدومسا سحر، يا آخشام،
آرادين سن مني، گؤردون سن مني.
ايندي گؤزلري نين قاباغيندايام،
هاياندا دوروم کي،
گؤره سن مني؟
***
2)
دئييرلر جهنمي،
جنّتي وار عالمين.
بو – سنسيز و سنينله
کيمي بير شئيدير يقين.
***
3)
من عينادجيل گؤزل ايله دانيشيرام آستادان،
بير طلبه ناراضيدير، منه باخير آرابير.
من بيليرم؛
ايمتاحانا حاضيرلاشير او جاوان،
من بو ساعات ايمتاحاندان کسيليرم…
او بيلمير.
***
4)
کينودا ايکي يئر بوش قالدي بو گون،
ايکي تاماشاچي آزالدي بو گون.
گئتديک… ايکيميزي ايتيردي باغلار.
کينويا گئتميشديک،
سوروشاجاقلار:
دئسه لر نئجيدي؟
دئ کي، قييامت!
دئسه لر نه ايدي؟
دئ کي، محبت!
دوز دئسن قورخورام… آخي سؤز اولار.
بو دفعه يالان دئ،
قوي اينانسينلار.
***
5)
بو دونيا نرديواندي.
قالخاندا مئهريباندي
ائننده نه ياماندي.
گؤروشدوک پيلله لرده،
يولون ياريسيندا بيز.
او قالخيردي بو دمده،
من ائنيرديم خبرسيز.
اونو آرزولارينا
قالديريدي نرديوان،
مني خاطيره لره ائنديريردي.
بو زامان،
بيريميز-گون چيخانا،
بيريميز-گون باتانا…
قالخا بيلمزديم داها،
نه او گوج، نه او طاقت.
او دا ائنه بيلمزدي.
حاقلي-حاقسيز، وئرميشدي
اؤز حؤکمونو طبيعت.
گرک يا دوشمه ييدي
بو گؤروش هئچ آرايا.
يا او اول گليدي،
يا من سونرا دونيايا.
***
6)
بير يول آيريجينا بنزه يير حيات،
ياراماز حياتين اوستونده اسمک.
جسارت ايسته يير، بير ده احتياط،
نه لنگيمک اولار، نه ده تلسمک.
احتياط ائله ديم اوردا کي، بير واخت،
جسارت هر شئيه، منجه، ديردي.
جسارت گؤسترديم اوردا کي، آنجاق،
عادي بير احتياط بس ائليردي.
بو دونيا غريبه بير اَيلنجه دير،
دونيا سرت، من بعضاً اوشاق خاصيت.
ياشاديم، بيلمه ديم بو دونيا ندير،
بيلمه ديم، دونيادا ندير سعادت.
کدريم دونيانين وئجينه دئييل،
سئوينجيم نئجه بس، دوشورمو يادا؟
بلکه دونيا اوچون، بو – هئچ نه دئييل،
نه قدر سئوينج وار، قم وار دونيادا.
دونيا سرگيسينده گؤروندوم، يئتر،
حقيقت دئديم من "يالان دونيا"يا،
دونياني اَيلنجه حساب ائدنلر،
ايله نيب باخسينلار بير آن دونيايا.
***
7)
سئن گئتدين، حسرتين قالدي جانيمدا،
سونرادان مات قالديم، دوزو بير شئيه.
غئيري-عادي ايدين منيم يانيمدا،
گئتدين، ائله بيل کي، ساده لشمه يه.
سنه يالواريرديم بوردا باياقدان،
ائشيکده قيش ايدي، اوتاقدا باهار.
سن ده گئديب ائوده يالواراجاقسان -
گئجيکديگين اوچون، باغيشلاسينلار.
سني باغيشلاماق… دونيايا بير باخ،
او قلبي، او روحو گرک دوياسان.
آخي سندن گرک عذر ايستيه لر،
لازيمسا، سن گرک باغيشلاياسان.
بير قلبين ان عزيز شاهزاده سييدين،
قوللوق گؤزله ييرديم حضوروندا من.
گئديب ائوينيزده سن اونا يقين
بير قوللوق گؤستريب، چاي سوزه جکسن.
گئتدين، اورئييمي ساليب توفانا،
صداقت حياتدا باشقا رنگ دئييل.
منيم سئوينجيمي آپاردين اونا،
بلکه ده اونا هئچ بو، گرک دئييل.
***
8)
سيزين قيزينيزلا گؤروشوروک بيز،
گئديريک گاه يوللا، گاه کنار ايزله.
بونو من بيليرم، سيز بيلميرسينيز،
او گلير سيزين اؤز ايجازه نيزله.
طلبه يولداشي، رفيقه سي وار،
ايشي ده چوخ اولور، بعضاً درسي ده.
منم قيزينيزين، نئجه دئيرلر،
"طلبه يولداشي"، "رفيقه سي"ده.
من باشا دوشورم، سيز آناسينيز.
اوره يه سيغيلميش عادي هيجان.
او ائوه دؤنونجه نيگارانسينيز،
ائوده اولاندا دا من نيگارانام.
بير عؤمرون منزيلي اوزاق، يا قيسا،
محبت، دوغماليق، هانسي قديمدير؟
او سيزين اينجه بير قيزينيزديرسا،
او منيم يئگانه سعادتيمدير.
سيز ده حئيرانسينيز، من ده بو قيزا،
کيمين قاپيسيندان او کئچمه ليدير؟
دونيا ائله دير کي، بيري تاپيرسا،
بيري، طبيعيدير… ايتيرمه ليدير.
دورولوق رمزيدير سيزين قيزينيز،
گؤزوندن اوخونور قلبي، عيصمتي.
سيزين بو سئودادا اودوزماغينيز،
سيزين بورجونوزدور، منيم قيسمتيم.
گرک دارالماسين بو عشقه حيات،
دئمگين بيز کيميک، نچيگيک، نييک.
ياد ايکن دوغماييق، دوغما ايکن ياد،
دونيا غريبه دير، بيز غريبه ييک.
سيزين آدينيزا حؤرمت، احتيرام،
قادين قارشيسيندا اَييليب عالم.
من ده باش اَييرم، ويدالاشيرام،
قيزينيز گله جک، من گئتمه لييم…
حاضيرلايان: علي دهقاني آذر
دوشونجه، ادبيات و اسطوره دونياسينا يئني بير باخيش آچيسي آختارانلارا خوش گلدينيز دئييب و اونلارين ايش بيرليگين گوزلوروك.